LONDRA DO TË JETË E GATSHME PËR SFIDAT E ARDHSHME

Shtëpia e Londrës në Pekin ka organizuar një aheng të dielën mbrëma pas mbylljes së lojërave olimpike Pekini 2008, derisa e tërë bota tani sytë i ka kthyer kah Londra, ku pas 4 vjetësh do të organizohen lojërat e 30-ta olimpike. Britanikët kanë 4 vjet kohë, mirëpo të gjithë janë të bindur se akrepat do të ecin shumë më shpejt se sa mendojnë të tjerët. Në ceremoninë e mbylljes së lojërave olimpike në Pekin, anglezët u përfaqësuan nga ylli i futbollit David Beckham si dhe kitaristi i Led Zeppelin, Jimmy Page. “Në pekin fituam 19 medalje të arta dhe kjo i ka motivuar shumë fëmijët të cilët tani kanë filluar të mendojnë të marrin pjesë në çiklizëm apo ndonjë sport tjetër”, ka deklaruar Beckham, i cili nuk e ka përjashtuar mundësinë e paraqitjes së përfaqësueses angleze në futboll gjatë lojërave olimpike të vitit 2012. “Mendoj se kemi paraqitur sado pak kulturën britanike. Ne ishim pjesë e këtij ceremoniali, ishim për të festuar dhe pikërisht atë e bëmë”, ka thënë kitaristi Jimmy Page. Gjithashtu të pranishëm në këtë aheng ishin edhe kryeministri britanik Gordon Brown dhe kryebashkiaku i Londrës, Boris Johnson. “Ju them kinezëve dhe i them tërë botës, pingpongu është duke ardhur në shtëpi”, ka deklaruar në humor Johnson. Organizatorët janë të bindur se do t’ia dalin të organizojnë olimpiadën edhe më mirë se kinezët.